روجينا تكشف كواليس لقائها بمحمد صلاح في تركيا

تحدثت الفنانة روجينا عن كواليس صورتها مع محمد صلاح نجم منتخب مصر في تركيا، وتغزلت في زوجها الفنان أشرف زكي.

قالت روجينا في لقاء مع الإعلامية شيرين سليمان ببرنامج سبوت لايت، المذاع على قناة صدى البلد: «لما بتمشي في شوارع تركيا وتتكلمي مصري فيقولوا إنتي من بلد محمد صلاح فتتعاملي معاملة الملوك والأمراء حب وضيافة ودلع».

وتابعت: «الحب مش جديد ولما كان بيلعب في ليفربول سافرت اتفرجت على ماتش هناك وشوفت حفاوة أهل ليفربول به ولما يجيب جون عاملين نشيد خاص به، وغريب أن لاعب كرة كل ما يروح بلد يتعمل له نشيد ولذلك حاسة بفخر كبير وروحت طرابزون كنت عايزة أشوف هل التجربة تشبه ليفربول؟ لقيتها أقوى».

واستكملت حديثها عن محمد صلاح: «هو سفير لمصر وإنسان متواضع ومحترم وبيحب شغله أوي ويستحق أكتر».

وفيما يخص علاقتها ببناتها، قالت روجينا: «أنا عايشة مع فرقة حرامية هما بيسرقوا أهم حاجة عندي شراباتي، ولما يعجبني فستان عند حد فيهم أقول هسرقه وهما كمان».

وأضافت روجينا: «ولو أنا خارجة آكل هاخد معايا إنجي علي وفي الشوبينج هاخد شيماء سيف هي بتشتري بلا هدف، وأسافر مع مايا ومريم بناتي ممتعين في السفر، ولو عندي مشكلة هكلم أشرف زكي معنديش غيره».

وقالت عن زوجها الفنان أشرف زكي: «هو صاحب الفضل والسند وحبيب عمري ورفيق الرحلة وحبيبي وبعد أمي هو اللي آمن بموهبتي ولحد دلوقتي بيدعمني وواقف في ضهري ربنا يحفظه ليا وللبنات».

واختتمت: «زمان كنت بتضايق وبحس إن النقابة واخداه مننا ومن البيت وبطلت لما بقيت أحس أن ربنا اختصه بحاجة كبيرة لقضاء حوائج الناس وأي حد في أزمة بيكلم أشرف زكي وهو عنده موهبة مش عند ناس كتير يعني أنا جدعة ولطيفة ولكن معنديش هذه الطاقة والأحاسيس مبحبش أروح جنازة أو عزاء برجع مكتئبة وبتعب نفسيًا وبعيط لكن هو ربنا يكون في عونه»

قد يهمك أيضــــــــــــــا

روجينا تكشف عن الشخصية التي ستقدمها في دراما رمضان 2024

روجينا توجه رسالة مليئة بالمحبة لزوجها الفنان أشرف زكي