أرسل لى صديق نصائح كتبها الأستاذ مصطفى نميرة لمواجهة موجة الغلاء المقبلة. مما جاء فيها:

الدليل المتين لحماية أموال المصرى المسكين.. إرشادات عامة لحماية القرشين اللى حيلتنا وتحقيق استفادة قصوى من موضوع تعويم الجنيه والغلاء اللى إحنا داخلين عليه:

1- اشترى، اشترى أى حاجة، المهم حاجة تقدر ترجع تبيعها تانى، شقة، أرض، بضاعة، ذهب أو فضة، المهم تخلص من الجنيه اللى معاك، هنا إحنا بنحافظ على قيمة مدخراتنا داخل أصول سعرها غالباً هيرتفع بعد التعويم.

2- قسّط أى حاجة بتشتريها، شرط أن التقسيط يكون بدون فوائد أو الفائدة تكون أقل من 10%، من الآخر اشترى دلوقتى وادفع بعدين، لو اشتريت مثلاً سلعة بالقسط ثمنها ألف جنيه النهارده، والجنيه فقد 30% من قيمته خلال عام، سعر السلعة مع آخر قسط هيكون 700 جنيه فقط مش ألف، انت الكسبان.

3- حاول متبيعش أى أصول دلوقتى، بيع لما تحس أن الدولار وصل لـ equilibrium أو لمرحلة استقرار فى السعر أمام الجنيه.

4- أى عقود هتمضيها، سواء كان عقد إيجار قانون جديد لشقة أو محل، أو عقد صيانة على ماكينات مصنع، أو أى عقد لخدمة هتحصل عليها لمدة معينة، حاول تخلى العقد ده ﻷطول فترة ممكنة، لو قدرت تعمله عشر سنين اعمله، السعر اللى انت هتمضى به العقد النهارده هيبقى لقطة بعد سنتين من دلوقتى، فى حالة القانون الجديد مثلاً، صاحب الشقة بعد سنتين تلاتة هيتفاجئ بغلاء شديد وارتفاع فى قيمة بيع وإيجارات العقارات وهيطمع، اضمن من دلوقتى السعر اللى هتدفعه لخمس سنوات مقبلة على الأقل، محدش عارف شكل الأسعار هيبقى إيه بعد كام سنة من دلوقتى.

5- لو عندك شقة ناوى تؤجرها، خلى مدة العقد لا تزيد على سنة أو اتنين على أقصى تقدير، حتى لو حطيت نسبة 5% أو 10% زيادة سنوية، بعد انتهاء مدة العقد حط سعر الإيجار الجديد بناءً على أسعار السوق الجديدة.

6- لو عايز تشترى عربية جديدة، أنصحك تشتريها مستعملة دلوقتى، وبعد سنتين تلاتة ارجع بيعها وهتكسب فيها كويس قوى.

7- افتح مصنع، الأسعار بتاعت السلع المستوردة هترتفع لدرجة إن الناس هيكون عندها شعور بأنها بتدفع كتير قوى فى حاجات متساويش، يعنى مش معقول مثلاً تدفع مرتب شهر كامل لموظف محترم فى جزمة أديداس! ده هيخلق طلب كبير قوى على بديل محلى، ادخل انت وصحابك شركاء واعملوا مصنع صغير، أنا مش عايزك تعمل مصنع صواريخ فضاء، عايزك تصنع أتفه وأسهل حاجة، صنّع أقلام، زراير، أكواب، أو شوف المصانع اللى موجودة بالفعل محتاجين إيه ومش عارفين يستوردوه وصنّع لهم البديل بجودة ممتازة، كلنا شفنا الفوانيس الخشب إزاى باعت كويس فى رمضان اللى فات بسبب جودتها ومشاكل الاستيراد، حاول كمان إنك تركز على التصدير، لأن الجنيه الضعيف والعمالة الرخيصة هتخلى أسعارك ممتازة بالمقارنة مع منافسيك.

8- اوعى تسيب فلوسك فى حسابات جارية بدون فوائد، لازم تتحط فى حسابات فائدتها على الأقل فوق 12% عشان بس تفضل محافظ على قيمة مدخراتك ومتتآكلش مع الوقت.

9- لا أنصح بالمضاربة على الدولار الفترة المقبلة، غالباً حركة الدولار هتكون متذبذبة قوى خصوصاً لمّا البنك المركزى يحصل على القروض الدولارية المقبلة من صندوق النقد أو من بيع سندات أو من الخليج، «المركزى» هيبدأ يلعب ضد المضاربين بـ supply shocks وضخ كميات كبيرة من الدولار بشكل متقطع ومفاجئ عشان يخسر المضاربين ويحافظ على سعر الدولار عند مستويات معينة، لكن طبعاً اللى معاه دولار وعايز يحتفظ به على المدى الطويل، مفيش مشاكل، يحطهم فى حساب دولارى ويخليهم.

10- وأخيراً، الناس اللى داخله على جواز، حاولوا تنجزوا نفسكم فى أسرع وقت ممكن، الوقت مش فى صالحكم، اشتروا الشبكة والأثاث والبيت النهارده قبل بكرة، الأسعار بتتحرك بسرعة مبالغ فيها اليومين دول، كل تأخيرة مفيهاش خيرة خالص دلوقتى.

بالتوفيق!