«لازم يكون فيه نور فى آخر النفق، ولازم كمان يكون فيه نفق، يكون فيه إرادة ورؤية».

هذه العبارة هى جزء من برنامج سيذاع على إذاعة راديو مصر فى رمضان، وسيعاد على محطات أخرى، وقطعاً هيكون موجود على «ساوند كلاود».

فكرة البرنامج هى دراسة كيف نجح الناجحون فى عالم السياسة والاقتصاد، كيف نقلوا مجتمعات من حال إلى حال. من طريق التخلف إلى طريق التقدم، إيه الاختيارات اللى كانت متاحة أمامهم، وكيف اختاروا، إيه التضحيات اللى كانت الشعوب مطالبة بيها، وإزاى ضحت؟

فى البرنامج هتكون هناك مناقشة جادة لإيه اللى حصل فى الصين من أيام ماوتس تونج ما وحدها لحد دينج تساو بينج ما جعلها ثانى أعظم اقتصاد فى العالم بعد ما كان تسلمها واحدة من أفقر 20 اقتصاداً فى العالم. هنروح لكوريا الجنوبية ونشوف إزاى تحولت تدريجياً من اقتصاد متخلف إلى اقتصاد متقدم، ومن دولة استبدادية إلى دولة ديمقراطية والدور المهم اللى لعبه بارك تشانج هى.

هنروح الإمارات ونشوف إزاى اتحولت من دويلات إلى دولة تقود اقتصاد المنطقة، والدور المهم اللى قام بيه الشيخ زايد بن سلطان آل نهيان. وهنزور السعودية، كمثال لواحدة من أكثر نماذج المنطقة نجاحاً فى بناء دولة متماسكة رغماً عن أن مقومات الدولة كانت شبه منعدمة فى الثلاثينات، وإيه التحديات اللى واجهت الملك عبدالعزيز آل سعود وهو بيواجه تحديات مهولة، لكنه نجح فى مواجهتها.

هنروح جنوب أفريقيا ورواندا ونشوف إزاى نجحت الناس هناك فى أن يتجاوزوا انقساماتهم وبناء دولتهم بقيادة زعامتين مهمتين: نيلسون مانديلا، وبول كاجامى.

هنروح للبرازيل ونعرف أكثر عن العامل البسيط ومساح الأحذية الذى وضع البرازيل على طريق التقدم الاقتصادى والعدالة الاجتماعية، لولا دا سيلفا.

هنروح لألمانيا عشان نتعرف على بيسمارك اللى وحدها، وكونراد أديناور اللى بناها بعد ما دمرت فى الحرب العالمية الثانية.

هنروح أمريكا ونتعرف على واشنطن، وماديسون، ولينكولن وإزاى نجحوا فى أن يخلقوا مجتمعاً متطوراً رغماً عن التنوع الشديد والتضارب الهائل فى المصالح. هنروح إنجلترا ونناقش قرارات أهم رئيسى وزراء فى تاريخ إنجلترا: ديزرائيلى وتشرشل، وإزاى كل واحد فيهم اتخذ القرارات الصح اللى أنقذت بلدهم. هنروح تركيا ونتعرف على مصطفى كمال أتاتورك، صانع الدولة، وعلى بابا جان، صانع النهضة.

هنروح الهند ونتعرف على بناة الهند: غاندى (فيلسوف الهند)، نهرو (رجل الدولة)، وأمبيدكار (رجل الدستور).

هنروح باكستان ونتعرف على محمد على جناح بما له من إنجازات وما عليه من أخطاء. هنروح إيران ونناقش دور الخومينى فى بناء إيران المعاصرة، والتحديات اللى بيضعها أمامنا.

هنروح اليابان ونتعرف على الإمبراطور هورى هيتو، وسلسلة من رؤساء الوزراء اللى نقلوا بلدهم من حيث كانت إلى حيث أصبحت.

هنروح روسيا ونعرف تاريخ الإمبراطور فريدريك الأول، ولينين وستالين، وكيف جاء بعدهم الرجل القوى بوتين عشان يواجه مشاكل نجح فى التعامل معها بكفاءة.

هنروح سنغافورة ونشوف لى كوان يو، الرجل الذى أعاد بناء شخصية الإنسان فى سنغافورة فبنى سنغافورة وجعلها الأعلى على مؤشرات السعادة فى العالم. هنروح لمهاتير محمد فى ماليزيا ونفهم هو عمل إيه، إزاى، وليه. هنروح لإثيوبيا عشان نعرف الإمبراطور هيلاسلاسى ومن ورائه ميليس زيناوى الذى وضع اللبنات الأولى لإثيوبيا المعاصرة.

رحلة طويلة، هنزور فيها كل قارات العالم، علشان نتعلم فيها الدروس التالية:

1- كتاب التقدم فى العالم اتكتب خلاص، علينا نقراه وناخد بيه.

2- مصر ككل الدول، والمصريون ككل الشعوب، ضعهم على طريق التقدم هيتقدموا.

3- الاستثمار فى البشر، وليس فقط فى الحجر، هو الذى يأخذ الأمم إلى الأمام.

4- نعم نستطيع، ولكن علينا أن نعرف من أين نبدأ.

ده كله هيكون فى برنامج «نقطة تحول».