# الدولاب بتاعها مش بيتقفل من كتر اللى جواه بس معندهاش حاجة تلبسها.. معروفة.

# البنت لو عملت فجأة كحكة.. فغالباً حالتها النفسية مش قد كده، ولو قررت تقص شعرها خالص بعد ما كان طويل يبقى هتاخد قرارات مصيرية تانية هتفاجأك جداااااا..

خدلك ساتر بقى.. واستعد للى جاى.. واقرا المعوذتين..

# مفيش ست على وجه الأرض بتحب المقارنة.. ما تقارنهاش بمامتك أو أختك أو أى واحدة.. المقارنة طريقة بتوصل لحارة سد.. مش هتوصلك لحاجة غير للبوز والنكد والعياط.. لو ليك فيهم.. دووووس..

# أقسم بالله العظيم تلاتة، بنحب الورد وبنموت فى المفاجآت حتى لو بحاجة هبلة جداً، حتى لو بماسج على الريق بس الحاجات دى بتفرق معانا قوى.. جرب مش هتخسر حاجة.. هتكسب كتير..

# العياط جزء من طبيعتنا.. مش حب فى النكد.. ربنا خلقنا بمنسوب معين من الدموع.. ودى فطرتنا مش محن يا سادة..

ولما ست بتعيط وجوزها يقولها لما تخلصى عياط قوليلى ويسيبها، بتبقى فى أسود لحظات حياتها.. طبطب عليها.. الطبطبة مش بفلوس.

# مكالمة «ها.. طمنينى عليكى وعملتى إيه انهارده» ما تستهترش بمفعولها.. بتخلينا نزأطط.. مش بقولك بنحب الاهتمام..

# لما تسأل ست مالك؟ وتقولك مفيش.. وانت واثق أنه فيه.. ما تقولهاش ماشى وتسيبها.. لازم تقلق.. وتجيب صاحبك الأنتيم يقلق معاك.. الموضوع مش بالسهولة دى.. بالنسبالنا كده انت مش بتحبنا ومش مهتم..

إحنا لو قلنا على اللى مزعلنا من أول «مالك»، بنحس أن فى حاجة غلط.. لازم نعترف أن ده طبع وممكن يكون مستفز بس محدش كامل.. ومعلش استحمل قولها مالك تلات ساعات وبعدها هتقولك..

# لو مراتك قالتلك أنا أحلى واللا ملكة جمال الكون والمجرات قولها هى طبعاً.. ما تحاولش تقول أى كلمة تانى..

# لما ست تسألك الأسئلة من نوع:

* هو انت مبقتش تحبنى؟

* أنا بالنسبالك إيه؟

الهدف منها أن الست بتنكشك عشان تقولها: إزاى ده انت حبيبتى ومليش غيرك.. مش تقولها إيه السؤال الأهبل ده، ما انتى عارفة إجابته.. مش هرد على الأسئلة الخايبة دى..

# طول ما انت قاعد قولها خسيتى أوى.. احلويتى.. إيه الشياكة دى.. مش هتخسر أى حاجة بالعكس هتعيش برنس..

# عيد ميلادها وعيد جوازكو ويوم قراية الفاتحة وأول يوم شفتها فيه بتبقى فاكراهم من كتر حبها واهتمامها مش عشان تغلس عليك..

# الكلمة الحلوة مفعولها سحرى لأى ست.. ومش هتكلفك 3 سعر حرارى..

# لما تعامل الست كويس مش بتتمرع زى ما فهموك.. بتحبك وتقدرك أكتر..

# الست ليها طموح وأحلام زيها زى الراجل.. ما تستهترش بالنقطة دى..

# الست لو قاعدة ساكتة على غير العادة وواخدة منك جنب.. اقلق وهات صاحبك اللى قلق معاك قبل كده يقلق معاك تانى وتالت.. الموضوع أكبر مما تتخيل.. فى كارثة.. حضر نفسك للقنبلة..

# الست لو الآيلينر بتاعها باظ أو الكحل ساح أو الإيشارب لفته ما ظبطتش، مودها بيبقى منيل بنيلة..

# الستات غالباً مش غلطانين..

ده من الثوابت الكونية.. ولو اعتذروا لازم يبرروا ليه غلطوا، وغالبا بيلطوك فى أى بلوة وهما بيعتذروا.

ففى الآخر بتلاقى نفسك انت اللى بتبوس راسها.. وبتتحايل عليها تفرد وشها.. فاعتذر لها من الأول وريح نفسك..

# قول على واحدة معدية أنها جامدة وفى نفس اللحظة خد المخدة بتاعتك وانت عارف مكانك على أنهى كنبة فى الليفنج..

# انتى تخنتى شوية.. الجملة دى لا تتقال بجد ولا بهزار..

مفيش هزار فى الموضوع ده الله يكرمك..

فى بيت وأسرة وكيان كله بيتلط وبيدفع تمن الجملة دى..

الخلاصة.. عامل مراتك المعاملة اللى تحب جوز بنتك يعامل بنتك بيها لما تتجوز.. هترتاح وتريحها..

الكلام السابق مهم كى يعرف الرجال عن النساء أكثر. كتبته ببراعة الأستاذة سارة الذهبى على موقعها على «الفيس بوك بوك» فنقلته بتصرف.